2 月 26, 2026 | 生意做得好，侵權自然到：中小企老闆五大維權攻略

1. 不少香港中小企老闆抱住心態：「侵權咋嘛？小事嚟啫，由得佢啦。」如果你咁諗，就大錯特錯。侵權就好似蟻竇，開頭得幾隻蟻，你唔理，幾個月後就成屋都係。再過一排，市場上侵權貨流通量分分鐘多過你正版貨。客戶開始貪平幫襯侵權店，零售商被迫轉賣侵權品，你嘅市場份額就係咁被人蠶食。

2. 所以，遇上侵權，一定要打，而且要愈快愈好。以下五招，係實戰中最有效嘅策略。

第一招：扼守網上平台，警告信降溫

3. 今時今日，侵權活動集中喺網上。無論係Facebook、Carousell定HKTVmall，一旦發現有人賣你嘅侵權貨，第一時間就要發出嚴厲警告信。千祈唔好睇小警告信嘅威力。只要信件措辭強硬、法律理據清晰，收信平台同侵權者多數會因為怕麻煩而即刻下架。即使侵權已氾濫，而家「亡羊補牢」，靠一輪密集發信，半年內可將公開侵權活動減少高達90%。

4. 呢步成本最低，回報最快，係「止血」關鍵。

第二招：法庭起訴「祭旗」，殺一儆百

5. 有啲侵權人在收到警告信可能不作理會。呢個時候，就可考慮入稟法院，揀一兩個最有代表性、最冥頑不靈嘅侵權人嚟起訴。根據經驗，絕大多數侵權人收到法庭傳票後會即時停手。因為佢哋計過數：一旦輸官司，唔單止要賠錢，仲要支付你一大筆訴訟費，加上嘥嘅精神時間，成本遠超賣老翻賺嘅利潤。

6. 除非係生意上的死對頭，否則正常商人收到告票多數會投降。法庭程序上採取「投降從寬、抗拒從嚴」策略，務求用最小成本換取最大勝利。

第三招：發表嚴正聲明，震懾市場

7. 打官司唔單止喺法庭內打，仲要喺市場上打。展開行動後，應該向公眾同客戶發出嚴正聲明。內容要夠硬淨：講明你會「絕不放過任何侵權人」，已經起訴咗邊啲人，同埋正申請禁制令同追討損失。呢份聲明有兩個作用：一，警告觀望嘅侵權者，你係嚟真嘅；二，說服客戶，同你買正版先有保障。呢種心理戰，往往能改變整個市場氛圍。

第四招：對「溝貨」客戶，懷柔拉攏

8. 市場上有一班客戶，佢哋會幫襯你買正貨，但轉頭又因為貪平去隔籬舖買老翻（即「溝貨」）。對該些客戶，唔適合一開始就趕盡殺絕，反而要採取懷柔政策。你可以主動聯絡佢哋，溫和通知停止侵權，同時展示你打擊侵權嘅決心。當佢哋見到你真係起訴咗幾個頑固分子，自己再繼續「溝貨」可能成為下一個被告時，多數會乖乖回頭繼續幫襯你買正貨。畢竟，冇人想因為貪少少錢而惹上官非。

第五招：舉報海關，刑事打擊引發漣漪效應

9. 如果侵權牽涉註冊商標或者版權，就已經超出民事範疇，屬於刑事罪行。你可以果斷向香港海關舉報。

10. 海關有權調查同檢控，即使只成功檢控一兩單案件，漣漪效應都巨大。因為一旦刑事入罪，侵權者唔單止留有案底，仲有機會要坐監。呢種刑事責任嘅阻嚇力，遠比民事賠償大，能夠最有效震懾整個行業。

總結：打擊侵權，係一場不能輸嘅仗

11. 侵權者就好似禿鷹，聞到錢腥就會成群飛嚟。如果你選擇視而不見，佢哋只會越食越多，最終吞噬你嘅市場。中小企資源有限，但只要把握「早發現、早處理」原則，善用警告信、民事訴訟、刑事舉報同市場公關呢幾招，絕對可以用最平成本，保住自己辛苦建立嘅品牌同市場。